Бүгүн, 2012 –жылдын 12-январында Кыргыз Республикасынын Шайлоо жана референдум өткөрүү боюнча борбордук комиссиясынын кезектеги жыйналышы өттү.

Кыргыз Республикасынын Конституциясынын 73-беренесинин 3-бөлүгүнүн
1,3-пункттарына, “Кыргыз Республикасынын Президентин жана Кыргыз Республикасынын Жогорку Кеңешинин депутаттарын шайлоо жөнүндө” конституциялык Мыйзамынын 65-беренесинин 4-бөлүгүнүн 1, 6-пункттарына, “Кыргыз Республикасынын Жогорку Кеңешинин депутаттарынын статусу жөнүндө” Кыргыз Республикасынын Мыйзамынын 3-беренесинин 1-бөлүгүнүн 1, 3-пункттарына, 2-бөлүгүнө, 5-беренесинин 1-бөлүгүнө ылайык, Кыргыз Республикасынын Борбордук шайлоо комиссиясы “Ар-Намыс” саясий партиясынан талапкерлердин тизмеси боюнча шайланган Кыргыз Республикасынын Жогорку Кеңешинин депутаты Г.У.Асымбекованы Кыргыз Республикасынын вице-премьер-министрдин кызмат ордуна, “Ар-Намыс” саясий партиясынан талапкерлердин тизмеси боюнча шайланган Кыргыз Республикасынын Жогорку Кеңешинин депутаты А.У.Жапаров Финансы министринин кызмат ордуна,   «Ата-Мекен» социалисттик саясий партиясынын талапкерлердин тизмеси боюнча шайланган Кыргыз Республикасынын Жогорку Кеңешинин депутаты Р.А.Сабиров Кыргыз Республикасынын Социалдык өнүктүрүү министринин кызмат ордуна дайындалгандыктарына байланыштуу, алардын ыйгарым укуктары мөөнөтүнөн мурда токтотуу жөнүндө токтомдор кабыл алды.

Кыргыз Республикасынын депутаттары катары ыйгарым укуктары токтотулган парламентарийлердин ордуна партиялардын талапкерлеринин тизмелери боюнча  “Ар-Намыс” саясий партиясынан К.К.Омурбеков, Э.А.Кочкаров, «Ата-Мекен» социалисттик саясий партиясынан Г.Дж. Бейшенбаева катталышты.

Ошондой эле, жыйында, жергиликтүү кеңештердин депутаттарын шайлоо боюнча шайлоо округдарынын схемалары жана чек аралары  бекитилди жана Бишкек шаарынын Октябрь аймактык шайлоо комиссиясынын курамына өзгөртүү киргизилди.

Кыргыз Республикасынын Борбордук шайлоо комиссиясынын басма сөз кызматы