Бүгүн, 26-июлда Кыргыз Республикасынын Шайлоо жана референдум өткөрүү боюнча Борбордук комиссиясынын төрагасы Туйгуналы Абдраимовдун басмасөз жыйыны болуп өттү. Төрага Т.Абдраимов Кыргыз Республикасынын Президентинин кызмат ордуна талапкерлерди шайлоо алдындагы үгүттөөгө катышуу үчүн КР жалпыга маалымдоо каражаттарын акредитациялоого тиешелүү маселелер боюнча негиздүү жана кеңири маалымат берди.

21-июлдагы БШКнын жыйналышында 40 телерадиокомпанияны жана 103 басмасөз басылмаларын акредитациялоо тууралуу чечим кабыл алынгандыгы белгилүү. Арыз берген 11 маалымат агенттиктерин (интернет-ресурстар) БШК “Кыргыз Республикасынын Президентин жана Кыргыз Республикасынын Жогорку Кеңешинин депутаттарын шайлоо жөнүндө” конституциялык Мыйзамда алардын шайлоо алдындагы үгүткө катышышы каралбагандыгына байланыштуу акредитациялаган эмес.

Төрага Т.Абдраимов ЖМК өкүлдөрүнөн дагы бир жолу “Кыргыз Республикасынын Президентин жана Кыргыз Республикасынын Жогорку Кеңешинин депутаттарын шайлоо жөнүндө” Кыргыз Республикасынын конституциялык Мыйзамынын “Шайлоочууларды кабарландыруу жана шайлоо алдындагы үгүттү жүргүзүү” 22-беренесин терең карап чыгууну жана мындан ары “шайлоочуларды кабарландыруу жана шайлоо алдындагы үгүттү жүргүзүү” түшүнүктөрүн алмаштырбоону суранды.

Ал аталган мыйзамда Кыргыз Республикасынын аймагында таркатылган чет элдик массалык маалымат каражаттарына шайлоо алдындагы үгүттү жүргүзүүгө тыюуу салынгандыгын эскертти. Айрым серепчилердин, депутаттардын, журналисттердин айткан сөздөрүнө комментарий берүү менен Т.Абдраимов БШК мыйзамга ылайык так иш алып барып жаткандыгын белгиледи.

Журналисттердин эмне үчүн мурдагы шайлоо процессинде интернет-ресурстарга шайлоо алдындагы үгүткө жол берилген деген суроосуна Т.Абдраимов андай көрүнүш болгон, анда БШК этиканын ченемин бузган интернет-басылмаларга жеткиликтүү таасир бере алган эмес деп жооп берди.

“Ушул басмасөз жыйынынан кийин маалымат агенттиктери акредитацияланабы” деген суроого БШК төрагасы мыйзамдарга өзгөртүү же толуктоо киргизүү Кыргыз Республикасынын Жогорку Кеңешинин гана прерогативасы, жана эгерде интернет басылмаларды акредитациялоого карата мыйзамдарга тийиштүү өзгөртүүлөр киргизилсе БШК аларды акредитациялайт деп белгиледи.    

Кыргыз Республикасынын Борбордук шайлоо комиссиясынын Басма сөз кызматы