2011-жылдын 10-августунда Кыргыз Республикасынын Борбордук шайлоо комиссиясына Кыргыз Республикасынын Президентинин кызмат ордуна талапкерликке көрсөтүү ниети жөнүндө Кубанычбек Исабеков, 1957-ж.т., “Нарын” Кыргыз-Германиялык ЖЧК генералдык директору; Мадияр Кулуев, 1966-ж.т, Бишкек ш. Октябрь районун ИИБ башчысы, милициянын полковниги; Жумабек Токтогазиев,  1958-ж.т.,  «Шатен» курулуш фирмасынын директору; Полотбек Кенжекулов,  1951-ж.т., убактылуу иштебейт; Сейтек Байгуттиев, 1965-ж.т., «Толубай» ЖАК АКБ директорлор Кеңешинин мүчөсү; Жусупжан Пиримбаев, 1954-ж.т., “Реформа” журналынын башкы редактору, “Манас” КТУ экономика кафедрасынын башчысы, экономика илимдеринин кандидаты арыз беришти.  

2011-жылдын 9-августунда Кыргыз Республикасынын Борбордук шайлоо комиссиясына Кыргыз Республикасынын Президентинин кызмат ордуна талапкер катары көрсөтүү жөнүндө 1960-жылы туулган, КР улуттук коопсуздук Мамлекеттик комитетинин биринчи орун басары, КР УКМКнын Терроризимге каршы борборунун директору Марат Иманкуловдон жана 1952-жылы туулган, Камбар-Ата-2 ГЭСинин мастери Калмамат Мактымбаевден арыз түштү. 

Бүгүн, 8-августта Кыргыз Республикасынын Шайлоо жана референдум өткөрүү боюнча борбордук комиссиясы кезектеги жыйынында Кыргыз Республикасынын Президентинин кызмат ордуна талапкерлер Назарбек Нышановдун, Оомат Казакбаевдин, Асида Иманалиеванын жана Камчыбек Ташиевдин ыйгарым укуктуу өкүлдөрүн каттады. 

2011-жылдын 8-август күнүнүн экинчи жарымында Кыргыз Республикасынын Борбордук шайлоо комиссиясына Кыргыз Республикасынын Президентинин кызмат ордуна талапкерлерди көрсөтүү жөнүндө “Ата –Мекен” жана “Эркин Кыргызстан” саясий партияларынан протоколдор келип түштү. “Ата- Мекен” партиясы партиянын төрагасы, 1958 – жылы туулган, Кыргыз Республикасынын  Жогорку Кеңешинин депутаты Өмүрбек Текебаевдин, ал эми “Эркин Кыргызстан” партиясы партиянын лидери, 1958 –жылы туулган, Кыргыз Республикасынын Жогорку Кеңешинин депутаты, философия илимдеринин кандидаты Турсунбай Бакир уулунун талапкерлигин көрсөтүштү.

2011 –жылдын 3-4 –августунда Кыргыз Республикасынын шайлоо жана референдум өткөрүү боюнча Борбордук комиссиясынын (мындан ары –Борбордук шайлоо комиссиясы) атайын өкүлдөрү үчүн семинар-тренинг өткөрүлдү. Аталган иш- чараны чагылдырууда айрым массалык маалымат каражаттары тарабынан так эместиктерге жол берилген. Тактап айтканда, “атайын өкүлдөрдүн штаттык санын КР Өкмөтү КР Жогорку Кеңешинин профилдик комитети менен макулдашып туруп бекитет, Жогорку Кеңештин ушул жылдын 15-августуна белгиленген кезексиз жыйналышында атайын өкүлдөрдөргө талапкерлер бекитилет. Системдик администраторлорду болсо аймактык шайлоо комиссиялары дайындашат” деген жаңылыш маалымат кетирилген. 

2011-жылдын 6-августунда Кыргыз Республикасынын Борбордук шайлоо комиссиясына    Кыргыз Республикасынын Президентинин кызмат ордуна өзүн өзү талапкер кылып көрсөтүү жөнүндө 1946–жылы туулган, Кыргыз Республикасынын Казакстан Республикасындагы толук жана ыйгарым укуктуу элчиси Жаныш Рустенбековдон арыз келип түштү.

Ошентип, 2011 –жылдын 6 –августуна карата КР Президентинин кызмат ордуна 35 талапкер көрсөтүлдү, алардын 7 – саясый партиялардан, 28 – өзүн өзү көрсөткөндөр. 

2011 – жылдын 4 –августуна Кыргыз Республикасынын Борбордук шайлоо комиссиясына    Кыргыз Республикасынын Президентинин кызмат ордуна өзүлөрүн өзү талапкер кылып көрсөтүү жөнүндө 1969 –жылы туулган, “Кара –Балта” спирт заводу” Мамлекеттик ишканасынын директору Сооронбай Дыйкановдон жана 1959 –жылы туулган, убактылуу жумушсуз Оомат Казакбаевден арыз келип түштү. 

Кыргыз Республикасынын борбордук шайлоо комиссиясы Кыргыз Республикасынын Президентинин кызмат ордуна талапкерлердин толук ыйгарым укуктуу өкүлдөрүн каттады.

2011 – жылдын 2–августуна Кыргыз Республикасынын Борбордук шайлоо комиссиясына Кыргыз Республикасынын кызмат ордуна 30 талапкерден арыз түштү.

Кыргыз Республикасынын шайлоо жана референдум өткөрүү боюнча Борбордук комиссиясы 2011 –жылдын 3-4-августунда  БШКнын атайын өкүлдөрү үчүн шайлоонун жаңы мыйзамдары жөнүндө семинар –тренинг өткөрөт.

Урматтуу Кыргыз Республикасынын жарандары!

Кыргыз Республикасынын Президентин шайлоону өткөрүүдө негизги звено болуп эсептеле турган  участкалык комиссиялардын курамына  саясий партиялардан жана жергиликтүү өз алдынча башкаруунун өкүлчүлүк органдарынан өкүлдөрдү көрсөтүү улантылууда. Участкалык шайлоо комиссияларынын курамдарына талапкерлерди көрсөтүү 2011-жылдын 10 – августунда аяктайт. 

2011 – жылдын 1 –августуна Кыргыз Республикасынын Борбордук шайлоо комиссиясына “Кыргызстан жумушчу партиясынан” Кыргыз Республикасынын Президентинин кызмат ордуна “Кыргызстан жумушчу партиясынын” төрагасы, 1971 – жылы туулган Замирбек Парманкуловду талапкер кылып көрсөтүү жөнүндө протокол келип түштү. 

Борбордук шайлоо комиссиясы тил Комиссиясынын дагы эки мүчөсүнүн: КМУУ кыргыз тили кафедрасынын башчысы, филология илимдеринин доктору, профессор Турусбек Сейдакматович Маразыковдун жана “Манас” КТУ чет тилдер институнун директору, филология илимдеринин доктору Замира Касымбековна Дербишеванын  талапкерлигин бекитти. Ушуну менен Борбордук шайлоо комиссиясы Кыргыз Республикасынын Президентинин кызмат ордуна талапкерлердин мамлекеттик тилди билүүсүн аныктоо үчүн курамы 12 кишиден турган тил боюнча Комиссияны түзүп бүттү.

Бүгүн, 29-июлда Кыргыз Республикасынын Шайлоо жана референдум өткөрүү боюнча Борбордук комиссиясынын кезектеги жыйналышы Кыргыз Республикасынын Жогорку Кеңешинин депутаттыгына  “Республика” саясый партиясынын талапкерлеринин тизмесинен Аманылло Розыбаевич Иминовду каттады. Борбордук шайлоо комиссиясынын төрагасы Т.Абдраимов ага белгиленген үлгүдөгү төш белги жана күбөлүк тапшырды.